heba ismail

المقالة التالته في تحدي الأسبوع الواحد بتتكلم عن
السؤال المهم في اي حاجة بتفكر تعملها واللي هوا " أنا هستفاد ايه لما ابدأ التحدي ده يعني حضرتك ؟ ! "

- اول حاجة هتستفادها انك هتعمل حاجة جديدة عليك (غالبا) ودا في حد ذاته حاجة كويسة خصوصا وانك عارف انها جديدة ومفيده وممتعه

- تاني حاجة انك بتاخد خطوة تساعدك تظبط حاجات كتير في حياتك لإن اغلب الأخطاء اللي بنعملها او الحاجات اللي بنعاني منها بتكون بسبب عادات غلط ماشيين عليها وبنعملها ومن كتر ما عقلك حافظها اكتر من اسمه فبيتعامل بيها ف كل المواقف وكأنها الوضع الافتراضي لتصرفاتك

- تالت حاجة بقى وخد بالك منها اوي وهي انك لو بدأت في لعبة التحدي دي  واشتغلت على عادة واحده كل اسبوع ف ده معناه انك هتكتسب 4 عادات ايجابية واحتمال تكون في نفس الوقت اتخلصت من 4 عادات سلبية ، متخيل "انت" النهارده و" انت" بعد شهر واحد ومكتسب عادات جديدة بتطور حياتك للأفضل ومتخلص من 4 عادات الله يسامحهم بقى على اللي عملوه قبل ما يمشوا ، ومتخيل هتبقى ضفت لنفسك ايه ؟ #تخيل_بقااااا

- رابع حاجة لو عجبتك اللعبة وقررت انك هتكمل فيها مثلا مثلا لأخر السنة بحيث انك مع بداية السنة الجديدة بإذن الله تكون بقيت إنسان جديد مترتب صح من جواه قبل براه و انسان قدر يبدل نفسه وحياته وقدر يكتسب عادات ويتخلص منها ولو حسبناها انك بتكتسب عادة واحده في الأسبوع  واحنا دلوقتي في اول مايو يعني معاك "  32 اسبوع " وتخيل انت الباقي  بقا و تخيل انت هتبقى عامل ازاي ف ليلة راس السنة ^_^

- خامس حاجة ان ممكن ، (ممكن يعني مش اكيد )
ان حد يشوفك بتتطور ف فترات قريبة ويسألك فتقوله على فكرة التحدي وانها تبان بسيطة بس هي عميقة  و بسببك يقرر ياخد الخطوة ويبدأ التحدي معاك وتخيل انت الباقي بردو  "

المقالة التاني  عن تحدي الأسبوع الواحد و ذي ما عملت مع المقالة الأولي هجاوب فيها على اسئله بتيجي على بال أي حد بيفكر او بدأ التحدي فعلا او هوضح جزئيه بتفصيل أكتر ومنها

- في فكرة تانية ممكن تتعامل بيها مع أي عاده و لكن المثال هيكون على عادة المبادرة لإن دي اللي اتعاملت معاها الأسبوع ده

الفكره هي انك هتشوف ايه الحاجات اللي بقالك فترة بتأجلها من غير سبب  وتعمل منها حاجة واحده كل يوم  يعني مثلا بقالي فترة عايزة اخرج اتفسح و عايزة اتمشي كنوع من الرياضة و من زمان عايزة اسأل على فلان او فلانه و عايزة اتعلم ربطه الطرحه دي او اعرف عن البرنامج ده نقطه معينه او اجرب اتعامل مع الآله الموسيقيه دي او عايزة اشتري حاجة وكل ده مأجله وبقول هبقي اعمله وهبقي اشتريه وهعمل وهعمل وما بتعملش وما بتعمليش ،  فالأسبوع ده هيكون فرصه كويسه جدا انك تجمع كل الحاجات اللي مأجلها من فتره و تاخد الخطوه انك تعملها وهيكون ده تطبيق عملي على اكتسابك لعادة المبادرة و تقدر تعمل كدا مع أي عادة هتختارها

التحدي بيبدأ بقرار منك ، قرار انك تطور نفسك وتعلمها ، قرار انك تاخد خطوات تبان انها بسيطة  بس تأثيرها كبير عليك  ، قرار ان بكرا اللي انت قررت انه يكون افضل من النهارده " هيكون" وانك الاسبوع الجاي هتكون افضل من الأسبوع ده

و مهم اوي تكون عارف انك في لعبه يعني بتلعب ،  ايوا ذي ما قريتها كدا " بتلعب " يعني مبسوط ورايق  وحابب تكمل علشان مستمتع بالوقت اللي بتقضيه في اللعب، بس الفرق هنا انك وانت بتلعب هتبقي بتتعلم وبتطور نفسك وبتاخد خطوات في حياتك وذي ما قولتلك تبان انها بسيطه بس عميقه 

ابدأ التحدي بعقلية لاعب الكورة  اللي هيبدأ الماتش بس عارف ان النجاح مش بالأهداف اللي هيجيبها ولكن بالطريقة اللي هيلعب بيها وبمدي استمتاعك وروقانك وانت بتلعب و بإنك بطريقتك دي هتعرف تشجع غيرك يلعب بكل روقان و انبساط زيك ، بدل ما كان شايف انه مضطر يلعب علشان مضطر يجيب جول علشان عايز ينجح

لو عرفت تكون كدا هتلاقي انك بتجيب اهداف اكتر وتركيزك بقى على ازاي العب احسن وافضل ومش ازاي انجح  وبس

دي أول مقالة هتكلم فيها عن "تحدي الأسبوع الواحد"
فكرة التحدي ده مش جديده ولكن حاولت افكر فيها بطريقة تشجعنا نبدأ  ونكون حابين اوي الخطوة دي

و في كل مقالة هجاوب على اسئلة بتيجي في بال اي حد بيفكر او بدأ فعلا التحدي

- اول حاجة ( ايه هوا تحدي الأسبوع الواحد ؟  )
فكرة التحدي بتقول اني كل اسبوع هختار حاجة واحده في حياتي سواء كانت (عادة ، صفه ) واشتغل على تطوير واتقانها طول الأسبوع

- طيب حد هيقول ازاي اقدر احدد العادة دي و درجة أهميتها ف حياتي ؟

انت هتسأل نفسك يه اكتر عادة سلبية مأثرة علي حياتك و هي السبب في حاجات مش لطيفه بتحصلك وبتختار العاده المعاكسة ليها اللي عايز تكتسبها او في طريقة تانية وهي انك تشوف ايه اكتر عادة إيجابية انت شايف انها هتضيف لحياتك كتير لو اكتسبتها وبناء على النقطتين دول بتقدر تحدد العادة اللي هتشتغل على تعلمها او تطويرها واتقانها الاسبوع ده

"على سبيل المثال لا الحصر " حد شايف انه بروفيسور في التخطيط وكتابة الخطط وخصوصا خصوصا اللي بتبقي ف اول السنة،  بس ساعة التنفيذ بيلاقي 100 حاجة تخليه ما يبدأش وتخلص السنة وتيجي اللي وراها و مفيش خطوات بتتاخد . طيب هنا نقدر نقول انه عادة التسويف او المماطلة اخده راحتها و عايشة حياتها و هوا مش قادر يقول لها " فيتووو" وبناء عليه هيقرر ان العادة اللي هيشتغل على اكتسابها او تطويرها الاسبوع ده هتكون عكس عادة التسويف ولتكن مثلا اسمها ( المبادرة)

- وطيب وبعد ما عرفت وقررت هعمل ايه ؟ ! !
هتيجي للخطوة اللي بعدها وهي انك تشوف ازاي ممكن تكتسب العادة دي سواء بإنك تقرأ عنها او تشوف حد مكتسبها وتتعلم منه عنها او بحاجة مهمه جدا وانا عن نفسب جربتها ولقيت انها اهم خطوة
واللي هي انك تعمل حاجات او تاخد خطوة في حياتك بناءا على العادة دي

هوضح بمثال عني ك "هبه" انا بدأت التحدي الاسبوع ده وكانت العادة اللي هشتغل عليها هي "المبادرة " فقولت لنفسي انا هاخد خطوات كنت بأجلها كتير ومش بعملها مع انها كانت مهمه جدا تتعمل وهي اني اعيد تصميم مدونتي بشكل يكون أفضل واكتب مقالات عن التحدي و هشرح فيها كل حاجة تخصه و هعمل فيديو اتكلم فيه بردو عن التحدي ذي ما عملت فيديو لتحدي ال100 يوم سعادة من 3 شهور وفعلا بدأت والمقالة اللي قلت هكتبها اهيه انتم بتقرأوها دلوقتي   ^_^

طبعا بفضل ربنا ثم بفضل تركيزي على عادة المباردة واللي في نفس الوقت بكون لغيت عادة التسويف بس وانا مركزه على الجزء اللي عيزاه يزيد (المبادرة ) مش الجزء اللي عيزاه يختفي (التسويف)
يعني مش بقول بتخلص من التسويف ولكن بقول اني بكتسب عادة المبادرة وبركز على كل حاجة تساعدني اكتسبها او اطورها او اتقنها او او .