- نام متاخر و اصحي براحتك
- اقعد في البيت وما تشوفش حد
- ما تعملش اي حاجة في يومك
- متنساش تاكل كويس كل ما تشوف أى اكل
- خليك فاكر ميعاد المسلسل اللى بتموت فيه
- او اخرج طول اليوم وكل يوم قابل صحابك وسيبك من اي حاجة
- تابع الفيس بوك وتويتر والواتس آب كويس اوى ولو في جديد ما يضرش
- اوعى تقرا كتاب ولا تحضر ايفنت في اي مجال , الحاجات دي للناس الفاضية اللي مش لاقيه حاجة تعملها
- إياك تسمع كلام الناس اللى بتقولك طور نفسك واشتغل عليها كويس وخلي كل يوم يكون خطوة حلوة لسنينك الجاية ! ,, دي ناس بتقول كلام إنشا علشان تلم الناس حواليها وتتشهر علي حسك صدقني
- حذااري وانا بحذرك اهو من الناس اللى تقولك قوي لغتك ولا اتعلم لغة جديدة تفتح بيها عقلك ويزيد وعيك , انا مش هقولك هيحصلك ايه لو سمعت كلامهم
انا عارفة انك كويس ومش بتسمع الحاجات اللي تغيرك دي
بس في نفس الوقت لو بتعمل كل اللي حصل من شوية ده ضروري تكون عارف شوية حاجات ! .
فمثلاً لو كان ليك زميل تعرفه من ايام الكلية ومرة واحده وانت بتتمشي علي الفيس ولا بتتفرج علي التلفزيون لقيته قدامك في اعلان عن برنامجه اللى هيبدأ اول الشهر
قول عادي , اكيد ده شغال بالواسطة ما احنا مش هنخلص م الواسطة و المحسوبية بقي ,, تمام . المهم التمس له عذر علي اللي عمله ده!!
.
وبردو لو اتكعبلت في مرة بـ 2 من دفعتك من اللي كنت بتقول عليهم دول ناس فاضية ومش لاقيين حاجة يعملوها علشان كدا بيحضروا ندوات وكورسات ملهاش اي لازمه .. فاكرهم !
ولقيتهم شقوا طريقهم وحققوا احلام كنتو حلمتوها سوا بس الفرق انهم اخدو الخطوة اللي بعد التمنى
اوعى تفكر انهم اعتمدوا علي نفسهم و أخدوا خطوة في حياتهم واشتغلو كتير
قول عادي يعنى ما طلعوش القمر
اوعى تسأل نفسك الاسئلة المضرة بالصحة دي نوعية
انا عايش ليه وبعمل ايه كل يوم ؟ , ايه هدفي ورسالتى من حياتى ؟
؟. ايه موهبتى وهوايتى ومميزاتى وعيوبي , بفيد مين ومين بيستفيد منى
بلاش تسأل الاسئلة دي لانك وقتها هتحتاج لأجابه عليهم وساعتها انت لازم تتحرك وتعمل عكس كل اللي بتعمله في يومك لإن الاجابه عليهم عايزة سعي منك
عايزة حد عايز يتطور ويعلم ويتعلم , حد كل همه انه يوصل للاجابة ويعرفها مهما ان كان الطريق شكله إيه, لانه مؤمن قد ايه هتفرق في حياته وفي شخصيته لو عرفها
ومؤمن اكتر انه له دور في الدنيا دي اكبر من انه ييجي ويخلص دراسته
ويشتغل علشان يتجوز ( دي سنة الحياة ) و ويجيب عيال علشان (العيال عزوه)
حد بيقول هجرب وهتعلم وهقرا و هشتغل علي نفسي ومش هبطل اسئلة طول ما انا عايش ولا هبطل ادور علي اجابة
لو شايف انك هتسال وعايز توصل للإجابه يبقي القرار في ايديك وانت الوحيد اللى ممكن توصل نفسك مش اي حد غيرك
ولو شايف انك مش عايز الاسئلة ولا محتاج الاجابة وعاجبك حياتك زي ما انت عليها
يبقي كمل فيها بس خليك عارف انك اختارت ماتسألش ✋
وفي الحالتين .. انت نتيجة اختيارك
0 comments:
Post a Comment