- لو جبت ف الاملاء 8 من 10 تلاقي اللي يقولك راحوا فين الدرجتين الباقيين ؟ هاه راحوا فين . انطق
-لما تجيب لحد موبايل هديه و أول ما ياخده تلاقيه بيقول الميموري صغير مش كنت تكبره شوية يا أخي ! !
-تعملي الغداء وتحضري السفره اشكال والوان وأول حد ييجي تلاقيه بيقولك مجبتيش الملح ليه ؟
تيجي ف يوم علي غير عادتك و متعمليش اللي عليكي فتلاقي اللي حواليكي كلهم عاملين ثورة ولا ثورة الانترنت و بينادوا بإقالتك نظرا لإن المدعو حضرتك إنسان مقصر ومش شايف شغله وكأن ال90 سنة اللي كنتي شغالة فيهم ذي مضرب الكيك مكنش العداد فيهم شغال وبالتالي متحسبوش
طبعا احنا بنضحك لما بنقرأ المواقف دي ،لانها غالبا بتحصل معانا والحقيقة انها بتضايق كتير مننا
طيب هل فكرنا مرة انه ممكن احنا كمان نكون بنعمل زيهم بالظبط واكتر كمان ؟ !
لما حد بيقدم لنا أي خدمة و من غير ما ناخد بالنا بنتكلم علي الحاجات اللي نقصت أو متعملتش بالظبط ذي ما كنا عايزين أو متعودين وبسبب الحاجة دي مخدناش بالنا أساسا من الجزء الحلو الجميل المظبوط اللي اتعمل لنا
في حالة بقي انك الشخص اللي اتعمل فيه الموقف ده
فحاول لما تعمل حاجة لأي حد او تساعده ما تبقاش بتعملها بس علشان مستنيه ياخد باله منها و يبدأ يشكرك عليها ساعتين مثلا . لأ ! . اعملها علشان هي صح انها تتعمل و لأنك حابب تعملها وتساعده و هي ف الأساس لوجه الله او عملا بالأية اللي بتقول) وما تنفقوا من خير يوف إليكم (
وخليك متأكد (إن الله لا يضيع اجر من احسن عملا ) يعنى انت شكرك و مكسبك اخده من قبل ما الخدمة توصل لصاحبها
تاني حاجة متفتكرش انه قاصد يبين عيوب شغلك ولكن اعرف ان في اشخاص عيونهم متعودة تشوف الجزء السلبي قبل الإيجابي وغالبا مش بيكونوا قاصدين ولكن هو وضع افتراضي منهم ومحاولوش يبدلوه للعكس
فتقبلهم بكل ما فيهم ولو قدرت تلفت نظرهم من بعيد على الفكره عموما مش عليك خصوصا يبقي تمام اووى
اما بقى في حالة انك الشخص اللي بيعمل كدا مع غيره
عود عيونك تشوف حاجة واحده على الأقل حلوة في اي حاجة حواليك , شوف الحلو ف الأكله و في الصحبه وفي السكن وفي البيت وفي اولادك وفي جيرانك و في مواقف حياتك و في اي تحدي تقابله في حياتك. عود عيونك تشوف الجمال في كل اللي حواليك علشان بعد كدا من غير ما تحس هتلاقي عيونك بقت رادار .وهتلاقي كمان إن رادار إدراكك اتعود انه يلقط المميزات والجمال في كل كل كل حياتك
تاني حاجة حاول تحط نفسك مكان غيرك وشوف هتحب الناس تكون دايما شايفه الجزء الناقص في اي حاجة بتعمها ؟ ولا هتحب انهم يقدروا اللي عملته ويحترموا مجهودك فيه لانه انت اكيد مش قصدك تنسي الجزء الناقص . ويا سيدي حتى لو عندك حق وفي حاجة غلط او حاجة ناقصة . مش ضروري انك تدب له الكلمه كدا وتقوله ع الغلط .داريها . جملها . عديها مره ومرة .. انت مش حكم في ماتش وبيدور على الاخطاء .. مش كدا ^_^
حد هيقول وايه فايدة كل الكلام ده ما انا كويس كدا ؟
لما بتعود عقلك انه يشوف الميزة في اللي بيحصل بيبقي واقعك كله مميزات و صفات جميلة شايفها في اللي حواليك
يعنى الترتيب اللي شوفتيه في اوضه ابنك النهارده لو شكرتيه عليه هيزيد و الطيبة اللي شوفتيها في ابنك او جوزك او مامتك او اختك لو أثنيتي عليها هتزيد وهتلاقي نفسك دايما معاملتك معاهم فيها طيبة حتى لو هما على النقيض مع الناس
فحاولي دايما تعودي عقلك انه يشوف الميزة اكتر ما يشوف العيب لانه اللي هيشوفه هيزيد
.
وأخيرا وليس أخرا
خليك الشخص اللي الناس تحس في قربه انها جميلة
0 comments:
Post a Comment